關智斌秘密寫歌送祖兒 Joey:想在演唱會上唱呢首歌

【老虎仔.com娛樂】話咁快,容祖兒同關智斌(Kenny)嘅「斌祖二世古」已經去到最後一集,離開北海道之前,佢哋除咗瘋狂買手信,亦都展開咗一段深情對話,原來十年前Kenny寫咗首歌畀祖兒,呢個秘密收埋喺Kenny心底十年,到今日先「開箱」,聽住歌睇住歌詞,真係每一個字都充滿愛呀!

https://www.youtube.com/watch?v=SZNsF5yiSEA

喺回程去機場嘅車上,佢哋終於有機會傾吓心事,講到點解會friend起上嚟,原來係因為一齊拍攝北京中央電視台嘅劇集。Kenny話祖兒其實惡唔出樣,又話祖兒喺朋友入面係一名「mean精」,祖兒仲講過一句說話令Kenny記足一世,「Kenny你真係好靚仔,不過可惜而家唔興你呢啲樣。」聽番Kenny咁講,祖兒即刻爆笑;至於祖兒就話Kenny一直都無變過,係「善良的斌」,亦都覺得佢一個人番內地拍劇,係要好毅力先可以捱過,係好值得尊
重。

去到戲肉,Kenny話好記得有一年頒獎禮,明明祖兒呼聲好高拎女歌手獎,但網民話要集氣「噓」佢,頒獎禮當晚宣佈祖兒攞獎時,坐喺台下面嘅Kenny好擔心,點知祖兒上台後,真係有人「噓」,祖兒話當年說話係衝動咗,「因為覺得有責任去保護我嘅朋友、同事。」因為呢件事,Kenny就填咗一份歌詞《勇氣情歌》鼓勵祖兒,仲即刻播畀祖兒聽,祖兒邊聽邊細味歌詞,「好多謝你呀寫歌畀我。」真係感動到呢。

事後祖兒話:「無諗過佢會識填詞,而且係為我而寫,感動已經唔能夠去形容到我嘅心情。我哋都係睇住對方成長、睇住大家經歷過啲乜,呢份友誼真係好難得。我真係好希望演唱會上可以唱到呢首歌。」

問到Kenny點解將呢個秘密收埋咁耐都唔講,佢就話:「因為我個人比較內斂,亦都覺得唔好意思。」十年後佢將呢個秘密公諸於世,佢話多得公司content team同佢brainstorm番出嚟,「最後一晚,團隊想我講啲我哋之間發生過而佢唔知嘅事、或者我為佢做過啲乜,我都諗咗好耐先記得番呢件事。如果唔係呢個節目,我真係無諗住講。」Kenny仲話其實佢好鍾意填詞,以往每隻碟都會有自己嘅作品。問到佢仲有乜嘢想同祖兒講,Kenny話不如唱出嚟,「朋友嘅嘢心照啦,我哋好少講出口,我哋通常唱出嚟,希望我再有機會為佢寫隻歌,用歌講畀佢聽。」

發表回覆

你的電郵地址並不會被公開。 必要欄位標記為 *